Vörutalning á jólahvolpunum

Við skelltum okkur í röntgen með Myrru í morgun til þess að kíkja á litlu meistarana sem eru væntaleg í þessari viku.

Mikil spenna er komin í okkur fyrir þessu goti, en sytkini þeirra úr fyrra gotinu eru fyrsta flokks hundar á allan hátt. Dökkir litir, mikil vinklun og gríðarlega góðar hreyfingar einkenna þau öll svo við minnumst nú ekki á geðslagið. 

ISShCh Gjósku Ruslana-Myrra er undan sjálfsagt einni allra bestu ræktunartík á Íslandi henni RW-14 Gjósku Myllu okkar, en undan Myllu eru 6 meistarar, og eru afkvæmin hennar samtals með 20 íslensk meistarastig og 11 Alþjóðleg meistarastig. Mylla hefur einnig unnið BESTI AFKVÆMAHÓPUR SÝNINGAR margsinnis.
Myrra hefur ekki mætt mikið á sýningar en alltaf gengið vel þegar að hún mætir. Hún varð fljótt meistari og hefur raðað sér á lista yfir stigahæstu tíkur landsins frá því að hún var einungis 11 mánaða. Hún er með gríðarlega góðan og mikinn feld fyrir tík og virðist gefa það sterkt áfram, ásamt hennar gríðarlega dökka og fallega lit, miklu hreyfingum og sterkt vinnueðli.

CIB BH AD IPO1 Kkl1 Jago z Wierchlesia er nýjasti innflutti rakkinn á Íslandi, en við ásamt Rut og Herði vinum okkar sem eiga Myrru, festum kaup á honum í fyrra eftir mikla leit af Remo vom Fichtenshlag skyldum hundi sem passaði inní ræktunarplönin okkar. Jago okkar hefur ekki mikið mætt á sýningar, en hann hefur verið mjög lengi að ná sér eftir flutning til landsins og dvöl í einangrun. Svona landsflutningar geta farið mjög mismunandi í hunda og eru sumir töluvert lengur að jafna sig en aðrir. Jago er þó allur að koma til og mætti á 2 sýningar eftir að hann fór að styrkjast. Hann mætti flottur til leiks á deildarsýningu schäferdeildarinnar þar sem hann sigraði gríðarlega stórann opinn flokk með excellent og meistaraefni ásamt frábærri umsögn frá dómaranum. Hann var því miður hárlaus á sumarsýningunni svo við mættum ekki með hann þá, en aftur mætti hann í september og er óhætt að segja að við vorum ekki ósátt með árangurinn þá. Hann vann aftur stórann opinn flokk með excellent og meistaraefni, svo gerði hann sér lítið fyrir og endaði sem annar besti rakki tegundar með sitt fyrsta Íslenska meistarastig og annað Alþjóðlega meistarastig. Þar sem að Jago hefur lokið öllum vinnuprófum sem til þarf bíður hann nú staðfestingar á alþjóðlega titlinum sínum CIB.  Jago átti fyrir gull fallega hvolpa útí Póllandi sem hefur gengið vel á sýningum þar og urðum við ekki fyrir vonbrigðum með gotið hans hérna heima. Jago sjálfur ber mikinn svip frá afa sínum Remo og urðum við svo heppin að hann virðist gefa það sterkt áfram.

Nú teljum við bara niður dagana í Gjósku W-gotið